Читам во денешно Време , во рубриката Хроника (ми вика сервис анавејлабл, неможам да ставам линк) за маките што си ги имале возачите од велосипедистите. Текстот напишан од новинар/ка, лаик за велосипедизам во секој случај, но барем е пробано да се даде опис на проблемот од сите засегнати страни. Проблемот е всушност многу едноставен. Тотално немање врска од страна на градските власти за конкретнава проблематика, натамошно поставување и одбележување на „велосипедски патеки“ без да се направи конкретна анализа и консултација со одредени експерти за вистинско решавање на проблемов. Резултатите се катастрофални и погубни, најчесто по велосипедистите. Одбележани се велосипедски патеки, премачкани со црвена боја (недај боже да бидеш приморан нагло да прикочиш на ова), најчесто на патеки по кои се движат и пешаци. Во летно време може да се набљудува и масовна узурпација на велосипедската патека што е поставена на кејот по должина на реката Вардар од страна на сите што можат да одат, или сеуште се учат да одат, за најразноразни активности. Одбележаните патеки се и онака во катастрофална состојба, разбирливо бидејки со многу тенок слој на боја дупките не се порамнуваат, а плус се и додатно узурпирани од  автомобили, пешаци, билборди, канти за ѓубре, а дел од нив се резервирани и за паркиралишта. Најпрост пример, поминете пред Бугарска амбасада, да видите како велосипедска патека од добри 70 цм одбележана со бела линија, наеднаш се претопува во дипломатски паркинг одбележан со жолта линија (се разбира дека ова е направено со нечив благослов од градските власти или од МВР). И така потрошени се пари, наши пари, од градскиот буџет за комплетна импровизација и нерешавање на проблемот.Велосипедистите се принудени да возат на коловозните ленти, секојдневно играјки си руски рулет, бидејки сите знаеме колку стрпливи возачи на автомобили сме во нашава држава. Велосипедистите се казнувани од страна на сообраќајната полиција за „непридржување кон правилата во сообраќајот“. Значи велосипедистите мора да ги почитуваат своите обврски кон сообраќајот а градските власти нивните обврски можат комплетно да ги занемарат.  Една препорака до градоначалникот, нека се качи на велосипед и нека проба од Ново Лисиче, или од Ѓоче Петров да стигне на работа. Притоа нека вози по одбележаните „велосипедски патеки“.Велосипедот е сепак едно од превозните средства на иднината. Потенцијалите на велосипедот се огромни  и од аспект на превоз и од аспект на рекреација. Многу луѓе се откажуваат од ова средство за превоз чисто поради проблемите и фрустрациите со кои се соочуваат низ скопските улици. Ние најупорните секојдневно сме притиснати од сите страни, а конкретнава ситуација им оди во прилог само на сообраќајците кои што имаат налог на било каков начин да го наполнат државниот буџет.