Оставка од премиерската функција е една од варијантите која ја разгледува македонскиот премиер Никола Груевски со неговата екипа, како форма на бегање од одговорноста за промената на името на Македонија.

Вака информираат за веб порталот журнал западни дипломати во Скопје кои инсистираат да останат анонимни.

Според нив, соочен со голем притисок за да се согласи со промена на името, Груевски ја разгледува можноста за оставка од премиерската функција, меѓутоа да остане на чело на ВМРО-ДПМНЕ.

Според ова сценарио, до донесувањето на одлуката за промена на името, Владата би ја раководел првиот заменик на Груевски, Зоран Ставревски.

На тој начин, Груевски верува дека одговорноста за промена на името ке ја сносат претседателот Георги Иванов, привремениот премиер Зоран Ставревски, и Министерот за надворешни работи Антонио Милошоски. Владата предводена од Ставревски би функционирала до предвремените избори кои би се одржувале напролет.

Не се исклучува можноста тие да се одржат во ист ден со референдумот на кој би се потврдила одлуката за промена на името.

Груевски со неговата екипа ги прават последните анализи дали ова е најдобрата варијанта за исполнување на обврската за промена на името од една страна, и зачувување на потребниот рејтинг за победа на предвремените избори од друга страна.

Единствената пречка останува меѓународната заедница, која тешко дека би се согласила со вакви акробации, во пресрет на решавање на едно толку значајно прашање за Македонија и регионот.