Камери на „ловците“ побрзи од возачите

Екипа на „Дневник“ беше во патрола со полициски тим од автомобилите-пресретнувачи опремени со радар-камери, па се увери дека сообраќајците во главниот град имаат преполни раце работа

Не сум крив, жими мајка не возев брзо, само со 60 километри на час. Видов дека има автомобил зад мене, ама не знаев дека е полиција!

Вака возач од Куманово ја убедуваше сообраќајната патрола, која со камера монтирана во необележен автомобил го улови како вози со 78 километри на час наместо со дозволената брзина помала од 60 километри на час, завчера во скопската населбата Автокоманда.

Екипа на „Дневник“ беше во патрола со полициски тим од специјалните автомобили-пресретнувачи, познати меѓу граѓаните како „ловци“. Се уверивме дека сообраќајците во главниот град имаат полни раце работа.

Агресивни возачи, возачи што не даваат првенство на минување, автомобили што вртат полукружно преку тревници сред булевар, несовесни пешаци, кои скокат преку жардиниерите на само неколку метри од пешачки премин се само дел од сообраќајните прекршоци што ги забележавме возејќи се во „ловецот“.

НЕДИСЦИПЛИНИРАНИ И ВОЗАЧИ И ПЕШАЦИ

Возилата „ловци“ се опремени со софистицирани радари со камера и компјутер, кои ги регистрираат и ги снимаат прекршоците што ги прават возачите и пешаците.

Специјалниот уред се состои од ДВР видеоснимач, поставен на инструмент-таблата и ЛЦД-монитор, закачен над совозачкото седиште. Камерата, поврзана со ГПС-систем, ги снима коловозот и возилото што е напред и ги регистрира неговата брзина, како и часот и датумот. Снимениот материјал може да се испечати на терминалниот печатач во автомобилот или може да се сними на читачот на кој има мемориска картичка од која потоа се вадат снимките на кои се уловени сообраќајните прекршители. На задното стакло на „ловецот“ има уште една камера и монитор.

Кога полицајците ќе забележат дека возач прави прекршок, пресретнувачот вози зад него на оддалеченост од пет-шест метри и го снима. По неколку моменти полицаецот-совозач преку прозорецот и со палка „стоп“ му дава знак на возачот да запре и да се паркира. Ако камерата сними возило што направило прекршок, а што е зад полицискиот автомобил, се вклучува светлосниот уред на задната страна на „ловецот“ на кој пишува „стоп-полиција“.

Со необележаниот автомобил пресретенувач и со двајцата полицајци од полициската станица за безбедност во патниот сообраќај при СВР Скопје, снимивме повеќе прекршители на сообраќајните правила.

Во почетокот од патролирањето со „ловецот“ се упативме кон излезот од Скопје, движејќи се по булеварот Александар Македонски во населбата Автокоманда.

На делот од булеварот што поминува низ населено место има густ сообраќај и многу пешаци, но ретки се возачи што внимаваат на ограничувањето на брзината. Додека се возевме, пред нас се движеше автомобил „фолксваген венто“ со кумановски регистарски таблички. Радарот покажа дека „вентото“ вози со брзина поголема од 60 километри на час и ја преминува дозволената брзина за движење во населено место. Веднаш почнавме да го следиме и да го снимаме. Брзината за кратко се зголеми на 70, а потоа на 78 километри на час. По речиси еден километар, полицаецот му даде знак да сопре на возачот, кој остана збунет.

Сообраќаецот го поздрави возачот и го праша дали знае дека направил прекршок.

- Не, не направив прекршок. Вие возевте зад мене и јас мислев дека сакате да ме поминете. Не знаев дека сте полиција - збунето одговараше возачот од Куманово.

Полицаецот му кажа дека возел со брзина поголема од дозволената, по што возачот упорно тврдеше дека возел со 60 километри на час. Потоа му кажа дека прекршокот е снимен со камерата и дека ако сака може да ја види снимката. Возачот се доближи до полициското возило и откако се увери дека направил прекршок, почна да го моли полицаецот да го пушти.

- Ве молам не ми пишувајте казна, годинава не сум казнет, па така и да заврши, друг пат ќе внимавам - бараше кумановецот.

Нашите соговорници раскажуваат дека најчест „изговор“ на возачите што направиле прекршок е дека не направиле никаков прекршок, а ретки се тие што ја признаваат вината.

- Го снимаме возачот и го запираме бидејќи со возилото поминал на црвено светло, а тој не' убедува дека светлото на семафорот било зелено. Секојдневно се среќаваме со вакви прекршоци, а дневно пишуваме по околу 200 казни - велат полицајците.

НИКОЈ НЕ ЈА ПРИЗНАВА ВИНАТА

Додека се возевме по булеварот Александар Македонски можевме да забележиме дека возачите, кои најверојатно се информирале за казните за непропуштање пешаци, дисциплинирано застануваа на пешачките премини.

Сообраќајците од „ловецот“ дневно пишуваат и по 200 казни за несовесните учесници во сообраќајот, кои направениот прекршок можат да го видат на мониторот или на испечатена фотографија

- Возачите сега повеќе ги почитуваат пешаците, но овде пешаците се' уште се плашат од возилата, па трчаат побрзо да ја преминат зебрата - вели нашиот соговорник.

Возејќи се кон Бит-пазар, пред надвозникот уловивме „голф“, кој преку тревникот сакаше да заврти полукружно и да се вклучи на спротивната страна од булеварот. Застанавме пред него, а возачот со раката ни покажуваше да продолжиме да возиме. Но, потоа виде дека во автомобилот се полицајци и сфати дека е фатен на дело.

Возачот излезе од „голфот“ и мавтајќи со рацете почна да објаснува како „во моментот му излегло нешто итно и морал да пресече преку тревникот“.

- Само што ми јавија дека нешто се случило со татко ми, па морав да се вратам назад. Ве молам не ми пишувајте казна - инсистираше возачот.

Полицаецот ги прегледа документите и му кажа на возачот дека за прекршокот ќе плати 25 евра.

- Бидејќи заврте полукружно, што е исто како да завртел на полна линија, возачот ќе биде казнет со 25 евра. Ако возачот ги загрозеше и другите учесници во сообраќајот, што во овој случај не беше направено, ќе требаше да плати казна од 300 евра и ќе добиеше забрана за управување со моторно возило од една година - ни објаснуваат сообраќајците.

Додека полицаецот го пополнуваше записникот, возачот упорно го убедуваше да го пушти. Откако записникот беше готов, полицаецот го праша возачот дали има забелешки.

- Немам забелешки, вие казнувате, во право сте - на крај призна возачот.

СНИМКИТЕ КАКО ДОКАЗ

Сообраќаецот му објасни дека наместо да плати казна, може да му бидат впишани негативни поени во возачката книшка, на што возачот се согласи.

Полицајците ни објаснија дека снимениот материјал и записникот на кој има потпис од прекршителот е доказ за прекршок, а снимките се доказ во судот за прекршоци.

Обиколката на градот ја продолживме по булеварот Партизански одреди, каде што, за чудо, возачите беа примерни. Но, не сите. Додека стоевме на пешачки премин, автобус на ЈСП со голема брзина помина покрај нас.

На пешачкиот премин кај хотелот „Карпош“ автомобил „фиат сејченто“ не пропушти пешак, кој веќе беше на средината на коловозот.

Камерата го улови „фиатот“ и веднаш бевме зад него. „Ловецот“ се доближи до „фиатот“, а полицаецот му даде знак да застане.

И овој пат возачот се чудеше каков прекршок направил. Полицаецот му објасни дека не пропуштил пешак и му ја покажа снимката. Потоа му кажа дека казната за овој прекршок е 300 евра и забрана за управување моторно возило до една година.

По ова, возачот се фати за глава. Кажа дека „не го видел пешакот“, а полицаецот му ги побара документите.

Но, освен сообраќајна дозвола за возилото, возачот со него немаше лична карта, ниту возачка дозвола.

- Набрзина излегов, имав нешто работа и не ги носам документите со мене, во другото возило ми се - велеше возачот.

Полицаецот му ги побара личните податоци и се јави кај колегите да проверат дали податоците се точни.

- Некои возачи сакаат да не' надитрат и ни даваат туѓи податоци на лица што се во странство или се отселени од земјава. Но, во базата за податоци ги имаме сите информации и веднаш ги откриваме измамниците - вели еден од полицајците.

По проверката се покажа дека овој скопјанец ги кажал вистинските податоци.

Бидејќи требаше да чекаме некој да му ги донесе личните документи на возачот или тој да биде приведен во полициска станица, полицајците решија да го казнат само со опомена.

- Многу ви благодарам, многу ви благодарам - им кажа возачот на полицајците и насмеан се врати во автомобилот.

Додека „фиатот“ си заминуваше полицајците прокоментираа дека се надеваат оти несовесниот возач наредниот пат ќе ги гледа пешаците и ќе застанува на пешачки премин.

Двочасовното дружење со сообраќајците го завршивме посакувајќи им да имаат што помалку работа, но со заеднички заклучок дека во Скопје е лесно да се пишуваат казни кога има многу недисциплинирани учесници во сообраќајот.

Даниела Вељановска