Запалено македонското знаме на фудбалскиот натпревар меѓу „Приштина“ и „Влазними“, одржан завчера на градскиот стадион во Приштина.

Знамето било запалено од навивачите на екипата на „Приштина“. За време на натпреварот цело време имало анти-македонски пароли.

Настанот се поврзува со реакциите по промовирањето на Македонската енциклопедија, за која се дебатира секој ден во пишаните и електронски медиуми во Косово.

Една од паролите била „Манки Маниаја“ и со неа навивачите го искривиле името Македонија.

Политичките аналитичари кои ги контактираше А1 велат дека целата атмосфера се создаде после некои неумерени и несмислени изјави на некои политичари во Албанија, Косово и Македонија.

Но, тие апелираат дека тоа е само моментална реакција, која е вообичаена во спортските настани и го карактеризираат како изолиран случај.

Во Косовската полиција ни изјавија дека за ваков инцидент немаат информации, бидејќи никој не пријавил такво нешто.

Портпаролот Браим Хадија рече дека не демантира, дека можело да дојде до тоа, но случајот не е пријавен во полиција и затоа нема коментар.