Питер Сунде: Виновен. Фредрик Неиј: Виновен. Гофрид Свартхол: Виновен. Карл Лундстром : Виновен. Секој од обвинетите ќе добие по 1 година казна затвор и парични казни во вкупен износ од 3.620.000 долари. Пиратскиот залив падна!

"Судот на стокхолмскиот регион денеска осуди четири лица обвинети за прекршување на законот за авторски права. Обезбедувајќи вебсајт со добро развиени функции за пребарување, лесно аплодирање и простор за зачувување, и со тракер поврзан со вебсајтови, обвинетите го поттикнале криминалот сторен од лицата што споделуваат фајлови," стои во соопштението на судот.

Иако се обидуваа да се бранат како поединци, судот одлучи четворицата во случајот со Пиратскиот залив да ги суди како тим. Според судот, четворицата работеле заедно, биле свесни дека преку нивниот сервис се споделува авторски заштитен материјал, дека тие го олесниле истото и дека помогнале во прекршувањето на законот.

Во одлучувањето, судот решил да не ги зема во предвид техничките детали понудени од одбраната и да одлучува чисто врз основа на тоа дали постоела намера кај обвинетите, по што заклучиле дека има јасна намера на обвинетите да се поттикне споделување на дела заштитени од авторски права.

Иако судот ги отфрлил претераните барања за оштета поднесени од тужителот, сепак тој побара од 4-та обвинети да исплатат штета во вредност од 3,62 милиони долари.

Запрашан дали ова ќе значи дека и другите сајтови кои имаат линкови до торенти, како на пример Гугл, ќе бидат прогласени за нелегални, главниот судија одговорил дека одлуката се однесува само на овој случај.

Питер Сунде го прогласи судењето за "лажно," и на кратко порачал дека сите се изненадени од неговиот исход.

"Ние не можеме да платиме и не би платиле и да можеме. Ако ги имав парите, јас попрво би запалил се што поседувам," изјавил Сунде.

Адвокатите на обвинетите веќе поднесоа жалби против одлуката.