Драги форумџии, денес е празник Недела Сиропоустна („Прочка - Поклади“). Овој ден во Црквата Христова е од големо значење. Денес, секој со секого треба да се измири за сите да можеме, растоварени, да го започнеме Великиот Велигденски пост.

Секојдневните обврски продолжуваат. Во нив ние сме активни чинители. Значи, од нас многу работи ќе зависат.

Богоугодно би било ако тоа биде во согласност со Одредбите на Црквата. Сè треба да биде правилно насочено. „Двигателот“ (нашиот разум) треба сите наши делови да ги насочува кон Севишниот - сите да Му служат Нему. И стомакот, и рацете, и ноѕете, и ушите, и очите - сè. Ако, пак, малку „подзаборавиме“ на храната (телесна) нема ништо (телесно) да изгубиме, а, живеејќи согласно Божјите заповеди, ќе можеме да се издигнеме над себе си. Тогаш ќе ја почувствуваме силата Божја и ќе се увериме дека Бог прави чуда, и дека лесно можеме нашите телесни потреби да ги ставиме во функција за бидат движечка сила во обезбедувањето на „подобри позиции“ на нашата, од Бога дадена, душа.

На сите членови на Форумов, припадници на Светата Православна Христова Црква, што се подготвуваме да го започнеме подвигот на постот, Семилостивиот Господ Бог да ни помага подготвени да го дочекаме Христовото Воскресение.

На сите оние што, на било кој начин, се почувствувале повредени од мој напис, ги молам да ми простат, зашто, верувам, ако е човечки да си погрешиме - христијански е да си простуваме.

Господ нека биде со сите нас.