Се работи за проект кој наводно ќе чини околу пет милиони евра, кои Владата веќе ги има одобрено. Притоа вице-премиерот Зоран Ставревски наводно побарал проектот за скокалниците да биде готов до 31 декември.

Време е македонските скијачи да им се посветат на скоковите, и да ги баталат останатите дисциплини, во кои и баш не се прославија, бидејќи Агенцијата за млади и спорт (АМС), ја планира изградбата на ски-скокалници во државава. Проектот кој би бил финансиран од Владата, се уште е во подготвителна фаза. Од АМС засега само собираат информации и искуства со цел да се запознаат со условите кои се потребни за изградба на ваков спортски објект. Локацијата за градење не е утврдена, а како први кандидати за домаќини на натпреварите во овој летечки зимски спорт, се наметнуваат скијачките центри во Кожув и во Маврово.

- Овој проект е во фаза на истражување. Се консултираме со стручњаци од земјава и странство и вршиме испитување на јавното мислење, со цел да видиме дали би била исплатлива изградбата на скокалница во Македонија. Во план се и патувања во Словенија и во Сараево со цел да се консултираме со тамошните стручњаци - изјави директорот на АМС, Драган Ѓурчевски, кој и самиот се уште не знае колку би чинел овој проект.

Како што "Вест" дознава, се работи за сума од пет милиони евра која Владата ја има одобрено за овој проект. Притоа вице-премиерот Зоран Ставревски наводно побарал проектот за скокалниците да биде готов до 31 декември. Од балканските држави само Словенија располага со врвна скокалници и тоа две, кои се и дел од Светскиот куп. Тука е пред се познатата Планица, од каде што и нашиве ски-стручњнаци ќе се обидат да црпат искуства, а другата е онаа во Крањ. Станува збор за огромен спортски проект, кој воедно би бил и единствен во нашето окружување, ако се земе в предвид дека ниту една соседна држава не располага со првокласна ски-скокалница, која ги исполнува олимписките норми.

- Ова е сериозна работа, и на тој начин и приоѓаме, затоа сакаме што е можно подобро да ја проучиме ситуацијава, пред и официјално да се започне со изградбата. Никој на Балканот, а камо ли во Македонија нема градено ваков импозантен спортски објект веќе подолго време, и затоа ќе треба детално да се подготвиме - додаде Ѓурчевски.

Тој не одреди конкретен датум, кога би започнала реализацијата на проектот, но се очекува тоа да биде веднаш штом ќе се изработи деталниот план, со одобрение од Владата. Најоптимистички прогнози на Ѓурчевски се дека тоа ќе се случи во текот на идната година, или пак во 2010. Околу ова прашање во Агенцијата веќе работат со полна пареа. Тие стапиле во контакт и со Меѓународната скијачка федерација, и се очекува да се состанат, бидејќи ќе станува збор за скокалница која ќе ги исполнува меѓународните натпреварувачки норми, со кои би можела да конкурира и за место во календарот на Светскиот куп.