Невладина организација (НВО или на англиски NGO - Non-Government Organization) се „прави“ така што се регистрира во суд. За да ја прифати судот регистрацијата, треба да постојат неколку документи (за нив подоцна), а пред се`, основачко собрание на група на граѓани.
Значи, НВО се формира од група на граѓани кои имаат заеднички интерес по некое (било кое) општествено прашање. Студентите, како и да земеш, влегуваат во „граѓани“ - дури и ако се од село :-).
Основните документи кои се потребни се: Статут на организацијата, Список на членови на организацијата, список на членови на управниот одбор (или борд), претседател на УО, надзорен одбор ...
Ова можеби звучи сувопарно, но е од клучно значење за успешното работење на НВО-то. Читај подолу...

Во НВО-ата може да „вложи“ секој („Вложи“ е несреќно избран збор и НЕ го употребувајте пред финансиерите. „Финансира“, „помага“, „донира“ се подобри еуфемизми за чинот на давање на пари). „Секој“ значи секој. Фирми, влади (странски и домашнава), фондации, интересни групи, поединци ...
Се` што треба да се убеди некој да финансира е да се погоди некој негов интерес. НВО-ата обично се занимаваат со општествени интереси, на пример (деновиве популарна) анти-корупција, развој и заштита на одредени групи на граѓани (нпр. малтретирани жени, болни деца), па се` до селани на кои не им се допаѓа што патот не им го асфалтирале последниве 50 години. И да, здравјето на луѓето е сосема валидна причина и потреба на општеството за основање на НВО.
НО (знаевте дека ќе има „НО“, нели) - клучот е во тоа да се погодат желбите на финансиерите. Пред се`, треба да се има добро напишана mission statement и разработен план за тоа со што ќе се занимава организацијата. Тоа оди во Статутот, но и во други материјали кои ќе ги давате на потенцијалните финансиери.
За да се добијат пари, потребно е да се има добро разработен проект, кој ќе се занимава со одреден проблем и негово решавање или олеснување. Подобро е да се зафатите со некој пошироко присутен проблем или цел, на пример, дрогата кај младите, проблеми на пациентите на дијализа, што-знам ... (кога веќе зборуваме за здравство).
Испланирајте што ќе правите, која група ќе ја опфатите, како ќе работите, колку луѓе ќе учествуваат, кои трошоци ќе ги има (детално разработени, до тоа колку спајалици ќе се потрошат) ... и никогаш, никогаш, не пресметувајте „заработка“, „профит“ или нешто слично. Невладините организации по дефиниција се непрофитни и немаат заработка. Можете да пресметате некаква дневница за надворешни учесници или да платите некакви професионални услуги (нпр. превоз, печатење), но за себе не пресметувате ништо. Дозволено е и да се пресметуваат трошоци на канцеларијата (телефони, кирија, интернет, хартија ...) или некакви инвестиции во смисла на компјутерска опрема, столчиња, маси, обука дома или во странство (ова се нарекува „capacity building“). Но плата за себе и за другите членови - не. Тоа директно ќе значи одбивање на проектот.
Секогаш малку надувајте ги трошоците, за да остане по нешто и за вас. Но бидете подготвени дека секој финансиер бара детално водење на трошковници, поткрепени со сметки за секоја, па и најмала сума. Тоа е дел од секој проект - водење на детална евиденција. Исто така, секој проект бара завршен извештај, а ако е подолг и еден или повеќе времени извештаи. Ќе се изнапишувате.
Е сега - кој дава пари? Просурфај на http://www.mango.org.mk/ , ќе добиеш некаква идеја. Можеш да одиш и на „слепо“ - пишувај писма до разни амбасади, други странски организации од типот на USAID, UNDP и слично. Внимавај да имате добра идеја и разработен план.

Јас сум член на УО на две НВО (но нема сега за тоа).
НВО не се „има“, туку си член на НВО, дури и ако си нејзин основач. Во НВО не си газда, највеќе можеш да бидеш претседател на бордот, но тоа е подложно на гласање секоја година.

Судот е надлежен за регистрација. Просурфај малку по македонските НВО страници, распрашај се, сигурно некој ќе помогне во администрацијата. Скоро сите НВО имаат своја страница. Не користи Google, туку http://pogodok.com.mk
Имаше пред некое време и на Баграва некој со страница за ментално здравје, ми се чини ...

Бидете упорни и искрени во намерите. Веднаш да ти кажам - НЕМА да се обогатиш од ова, но ако направиш нешто корисно и помогнеш некому, ќе се чувствуваш добро.

Со среќа ...

ПС. И, добронамерна критика - купи си граматика на македонскиот јазик - со вакви грешки какви што имаш во прашањето, нема да стигнеш далеку.
Слично и ако пишуваш „Project proposal“ на англиски, кој е lingva franca во НВО светот. Најдобро е да најдеш некој „нативен“ зборувач на англиски да го прегледа текстот, или барем некој што е многу флуентен. Дури вреди и да се плати за ова, затоа што тоа може да биде make or brake фактор во процесот на одлучување.

Е сеа, на раат, си го читам она што го напишав.
Значи, стварно сум муле. Си ја сфатив домашната сериозно, и се распишав, к’о да ми е последно и ќе снема.
Уствари, знам што ми било. Кога ќе чујам дека некој сака да прави нешто добро (Александра, нели сакаш да правиш нешто добро?), засукувам ракави и ја да помогнам. Фин, фин, од Финска да бев, немаше да бидам пофин.

Јеби га.

Барам на гугл “Невладина организација“ прв погодок е токму оваа страница. Барам на погодок, прв погодок е токму оваа страница. Тоа бе чувари мои интернетовски