Lenovo, кинеската компанија која минатата година го купи PC бизнисот на IBM, ги потврди сомневањата дека тие нема да го поддржуваат или инсталираат оперативниот систем Linux на нивните desktop и laptop производи. Оваа одлука, која ја соопшти Frank Kardonski, worldwide product manager на Lenovo, разочара многу потенцијални клиенти со афинитети кон Linux.

Деловната одлука на Lenovo доаѓа по само неколку недели откако тие заедно со Microsoft се заложија за „реафирмација“ на нивниот заеднички настап на светскиот пазар преку договори за соработка.

Ова е навистина штета, бидејќи IBM беше голем поддржувач на open source и Linux, но изгледа дека тој дух не успеаа да им го пренесат на кинеските партнери. Штета е и за Lenovo, кој потенцијално ќе изгуби од профитот, ограничувајќи ја својата понуда исклучиво на еден оперативен систем, кој патем кажано, носи значителен процент од цената на целата конфигурација.

Од друга страна, двата најголеми конкурента на Lenovo, Dell и Hewlett-Packard нудат модели со прединсталиран Linux. Lenovo, верувам дека зад оваа одлука имате некој посериозен бизнис план, но пазете што правите, на лизгав терен сте.

Мене ми изгледа дека деновите на Linux допрва доаѓаат. Засега Linux доминира во полето на серверите, но полека грицка од колачот наречен market share од Microsoft. А тука е и фамозниот оперативен систем на Apple, Mac OS X, кој заедно со супериорната хардверска платформа промовираат квалитет без компромиси, иновативност и авантгарден дизајн.

Повеќе информации за Linux можеш да добиеш тука: Слободен софтвер Македонија.

Инаку, компјутерите на Lenovo можат да се набават и кај нас. Цените почнуваат од 315 евра без монитор и данок.

--
Преземено од: Panta Rei.