Порастот на блогосферата, со сиот тој милионски квантитет на мислења за најразлични теми, mainstream медиумите го дочекаа неспремно, иако тие се главните бизниси во чие поле на дејствување се посади овој електронски „плевел“. Сеуште лутајќи во обид да се дочекаат на нозе, а некои и замижувајќи пред фактот дека медиумите се либерализираат, сега класичните медиуми се во улога на Давид кој се бори со Голијат. Гуливер, закован за земјата од милиони Лилипутанци. Им се намалува читаноста, губат публика, која полека но сигурно се сели на Мрежата, им паѓа профитот и вредноста на акциите.

Но, независно од тоа кој добива, а кој губи, темата на овој текст е за реалниот придонес кој блоговите секојдневно го даваат во правец на демократизација на општеството. Класичните медиуми, независно од тоа дали се декларираат за една или друга опција, дали се леви, десни или централно ориентирани, независно дали и воопшто третираат политички теми, сепак имаат камења околу вратот, кои ги спречуваат да го изнесат СЕТО она што треба, без обзир на способните пера кои работат во нив. Тие се соочени со секакви притисоци, а во некои случаи и се создадени за самите да притискаат (за некого), што понекогаш ги прави троми мрчала и инертни премолчувачи на фактите.

Блогосферата пак, од друга страна, столбот на својата моќ, оската на својот силен и пробивен млаз од мисли ја има токму во својата ХЕТЕРОГЕНОСТ. Милиони луѓе, милиони ставови, мисли, идеи, често во антагонизам меѓу себе, се судираат или поддржуваат, се докажуваат и дебатираат, полнејќи ја Мрежата со човечко знаење, создавајќи нова Александриска библиотека на новиот милениум.

Тие се жив доказ за теоријата за Wisdom of Crowds од James Surowiecki.

Да се задржиме сега на еден конкретен пример, кој убаво ја илустрира улогата на блогосферата во демократизацијата на општеството, преку случај за кој медиумите молчат, а блогосферата урла.

Имено, Stephen Colbert, сатиричар кој кај нас е повеќе познат по „вклучувањата од Белата Куќа“, во рамки на шоуто на Comedy Central, наречено The Daily Show, поприлично ја посрами администрацијата на Буш, додека држеше говор на конференцијата „2006 White House Correspondents' Association Dinner“, каде беше во функција на главен забавувач. Стивен стои на само 2 метра од Џорџ Буш, безмилосно рендајќи го со својата остра сатира, со зборови како на пример:

"I believe the government that governs best is the government that governs least. And by these standards, we have set up a fabulous government in Iraq."

Или, да парафразирам една друга негова шега: „не ми се верува дека стојам до овој човек [покажува на Буш], ми се чини дека сонувам, овој мој идол... Човекот кој можеше да помогне!“. Имајќи во предвид дека зборуваше за најмоќниот човек на планетава, Стивен покажа дека навистина има „guts“, како што самиот кажа.

Сега да се вратиме на нашата компарација меѓу mainstream медиумите и блогосферата. Oд една страна, речиси сите мејнстрим медиуми молчеа за оваа случка, па човек судејќи по нив немаше ни да дознае што се случувало на конференцијата. Причините за молчењето се повеќе или помалку јасни, а имаат допирни точки со угледот на медиумот, нивото, темите кои ги обработува, но и политичката ориентираност. Од друга страна, блогосферата (и Internet воопшто) вриеше овие денови: луѓето коментираа за говорот, ставаа транскрипции, слики и видео клипови од говорот, "Stephen Colbert" беше најпребаруван таг на Technorati, keyword на Google, статија на Wikipedia, вест на Wikinews... Сосем очигледно - „граѓанските медиуми“ беа видно заинтересирани за настанот, граѓанскиот журнализам се докажа на дело и луѓето сепак имаа можност да ја дознаат вистината.

Заклучокот лесно се извлекува: независно дали како примарен или алтернативен извор на информации, блогосферата е моќен медиум кој придонесува за брза и едноставна комуникација меѓу луѓето. Создаден од луѓето, овој медиум е и секогаш ќе биде најкомпатибилен со нивните потреби и животен стил.

Дали блогосферата е совршена? Ни најмалку! Грешки има многу, а и во иднина ќе ги има. Впрочем, дел од нејзиниот шарм лежи токму во нејзината несовршеност. Дали блогосферата ќе ги уништи мејнстрим медиумите? Не, туку тие ќе се прилагодат на новата ситуација и ќе опстојат, само во малку изменет облик. Дали блогосферата е корисна, позитивна? Секако, да! Ова што сега го гледаме е само врвот на ледениот брег. Времето на „граѓанските медиуми“ допрва доаѓа!

Линк: видео со говорот на Stephen Colbert.

--
Пренесено од: Panta Rei