Во моментов, на МТВ оди емисијата на Иван Мирчевски, „Не заспивај сега“. Во неа темата е астрологијата. Поканети се гости кои ја поддржуваат астрологијата како наука, и гости кои се против. Јас ќе коментирам само за дилемата дали астрологијата е наука или не.

1. Аргументот на астролозите дека астрологијата е наука е дека таа користи научни знаења и методи (астрономија, математика, геометрија и слично), па оттука следи точноста на нивното тврдење.

2. Аргументот на противниците на астрологијата е дека независно што астрологијата може да користи алатки, знаења и методи кои се признаени од науката, таа сепак не е наука бидејќи не е егзактна, односно бидејќи не е мерлива, и бидејќи не постои начин да се докаже нејзината вистинитост во еден зададен систем. Со други зборови, астрологијата дава различни резултати, често спротивставени, и не постои метод или експеримент кој ќе ја покаже нејзината точност во секој можен случај.

Науката ги признава своите грешки, и секогаш се стреми кон вистината. Науката секогаш бара практични и емпириски методи со кои ќе ја докаже вистинитоста на својата теорија. За една теорија да биде точна, таа треба да е точна во секој можен случај. За да се побие теорија, доволно е да се побие во само еден случај.

Целата оваа дилема ме потсеќа и на сличната спротивставеност на аргументите на науката со својата теорија за Еволуција, и нејзините противници, со теориите за Креација и Интелигентен дизајн. Горе-долу, дилемите се расчистуваат на сличен начин, само дали има некој кој сака да ги прифати аргументите?

Апдејт:

Емисијата заврши, и беше тапа од аспект на давање одговор на основните прашања кои ги постави (додуша и за очекување, со обзир дека се работи за забавна емисија). Астролозите изнакажаа еден куп глупости и логички испревртени „факти“ со кои се трудеа да ги аргументираат своите тврдења, нормално постојано заборавајќи да ги пополнат огромните дупки на логичко и фактографско ниво.

Најсмешни ми беа нивните од ракав извадени податоци, со кои се расфрлаа во текот на целата емисија: некои генерални податоци како на пример дека „толку и толку проценти“ од „тие и тие“ правеле „тоа и тоа“. Секако, сите тие работи кои ги кажуваа: 1) немаа никаква основа или релевантен извор, и 2) беа сосем неважни за докажувањето дека астрологијата е наука.

Ете, ако сметаат дека сум ги оцрнил премногу и ако имаат факти со кои ќе ме побијат во тоа што го кажав погоре, нека дојдат дома кај мене - тие сигурно знаат каде живеам.

Астрономите, од друга страна, упорно се трудеа да направат поента, но сепак разговорот се водеше на две нивоа на разбирање, да не употребам некој погруб термин. ;-)

Како и да е, иако вистинските аргументи не допреа до повеќето во студиото (изгледа вклучувајќи го и водителот, бидејќи не покажа дека ги идентификувал и врз нив да го гради натамошниот тек на разговорот), иако не допреа до поголемиот дел од публиката (претпоставувам, според јавувањата и според образованоста во нашата земја), сепак допреа до некого и тоа е доволно за сега.

На астрономите им препорачувам да регистрираат вебсајт (why-astrology-sucks.info хе, хе, хе) и таму да ги сложат убаво сите аргументи кои ги имаат против астрологијата. Во меѓувреме, посети го нивниот сегашен вебсајт, astronomija.com.mk.

--
Од Panta Rei.